Hondakinen Prebentzioaren Europako Astea azaroaren 20tik 28ra egingo da

Hondakinen Prebentzioaren Europako Astea azaroaren 20tik 28ra egingo da

Aurten, Bortzirietako Mankomunitateak jarduera ugari prestatu ditu.
Poltsa berrerabilgarriak tolesgarriak

Mankomunitateak poltsak berrerabilgarriak erosi zituen, une oro gainean eraman ahal izateko, poltsan, motxilan, kotxean, sakelan, etab. Horrela, erosketak egitera goazenean erabilera bakarreko poltsak erabiltzea saihesten dugu eta sortutako hondakin kopurua murrizten ditugu. Poltsa horiek Mankomunitateak udan etxez etxe egin zuen materia organikorako edukiontzi marroia ezartzeko kanpainan banatu ziren. Hala ere, ezin izan zen Bortzirietako familia guztiekin harremanetan jarri; beraz, eman ezin izan zitzaion poltsa eskuratu nahi duenak Mankomunitatera deitu edo Bortzirietako Garbigunera joan daiteke.

Fruta eta barazkiak erosteko poltsa berrerabilgarriak

Dendara fruta eta barazkiak erostera goazenean, sagarrak sartzeko poltsa txiki bat hartzeko joera izaten dugu, laranjak sartzeko bertze bat, azenarioentzako bertze bat, eta abar. Ondoren, etxera iritsi eta dena hozkailuan edo fruta-ontzian jartzen dugu, eta, askotan, poltsak botatzen ditugu, txikiegiak direlako bertze erabilera batzuk emateko; horregatik, hondakin asko sortzen ditugu, beharrik gabe.

Hori dela eta, Mankomunitateak beste kanpaina bat jarri du martxan, fruta eta barazkiak erosteko hiru poltsa garbigarri eta berrerabilgarriz osatutako pack bat banatzeko. Horrela, erabilera bakarreko poltsen hondakinak sortzea saihestuko da. Poltsa horiek erabiltzaileen eskura egongo dira Bortzirietako Garbigunean, eta fruta eta barazkiak soltean saltzen dituzten dendekin ere zuzenean ari gara lanean, ea haien saltokietatik banatu ahal izango liratekeen, gure bizilagunei haietarako sarbidea errazteko.
Elikagaien xahuketaren aurkako kanpaina

Bortzirietako Mankomunitateak, kasu honetan Baztango Udalarekin batera, elikagaien xahuketaren aurkako kanpaina bat jarri du abian. Kalkuluen arabera, Nafarroan urtean batez beste 75 kg elikagai botatzen dira etxeetan, eta kopuruak handiagoak dira ostalaritzaren sektorean. Horregatik, Mankomunitatea inguruko jatetxeekin harremanetan jarri da, eta kanpaina honetan parte hartzera animatu ditu. Kanpaina horretan, zakarrontzira botatzen den elikagai kopurua gutxitzen saiatuko dira, eta, gainera, jankideei aukera emango diete tupper batean jan ez den janaria etxera eramateko. Tupper horiek Nafarroako Hondakinen Partzuergoak erosi ditu eta plastiko konpostagarriz eginda daude; beraz, gehiago erabiliko ez direnean, materia organikorako edukiontzi marroira bota behar dira, ez horira.

Oraingoz, 6 jatetxek erabaki dute ekimen honen alde egitea:

  • Zalain jatetxea
  • Botxo ostatua
  • Lenkonea jatetxea (Churrut)
  • Zubiondo jatetxea
  • Kasino ostatua
  • Linddurrenborda sagardotegia
Horiei guztiei tupperrak eta garraiatzeko kutxatxo bat emango zaizkie, bai eta sarrerako atean jartzeko itsasgarriak eta menuko edo kartako orrietarako txikiagoak diren beste batzuk ere. Sare sozialen bitartez zabalduko diren bi bideo ere prestatu dira.
Bestalde, hozkailu bat ere erosi da Alkaiagako Mankomunitatearen nabean kokatu dena, eta, Bortzirietako Gizarte Zerbitzuen Mankomunitatearekin batera, freskoen programari atxikitzeko eskatu zaio Nafarroako Elikagaien Bankuari, zerbitzu hori erabiltzen duten familien artean ontziratu gabeko beste elikagai mota batzuk banatu ahal izateko. Bortzirietako tabernak, jatetxeak eta elikadura-saltokiak ere animatu dira jangarriak diren baina saldu ez diren elikagaiak ematera, elikagai horiek alferrik ez galtzeko eta Elikagaien Bankuaren eskaintza hobetzeko.

Leave a Reply